Esto es ya tresera vez ke el Sentro Moshe David Gaon de Kultura Djudeo-Espanyole de la Universidad Ben-Gurion del Negev i el Sentro de Investigasion de Kultura Sefaradi Otomano-Turka estan colaborando kon el Sentro de Estudios Mediteraneos de la Universidad de Zagreb (kolokado en Dubrovnik) en la organizasion de un kongreso bianual de kultura djudia.
El kongreso tomo lugar en Dubrovniks, entre el 17 i el 19 de Ogosto 2010. Kongresos internacionales temáticos tienen por buto el adelantamiento de siertos kampos de investigasion, ke asta alora non fueron en el foko del intereso akademiko o puvliko, ovligando ansina a los partisipantes de deshar sus «nishas» respectivas i de dedikarse a unas temas muevas, menos kosidas i investigadas. Komo rezultado, en estos dipos de kongresos se krea un dialogo vero entre los investigadores, el kual, por su natura, es un dialogo multidistsiplinario, siendo ke kada investigador trata a la tema de punto de vista de su distsiplina, i la analiza kon instrumentos sientifikos empleados en eya.
Esta vez se dechidio de adelantar la investigación de la MAJIA I MEDISINA en la kultura djudia. Komo i en las vezes pasadas, oganyo tambien partisipan en el kongreso mas de trenta investigadores provinientes de diez paizes (Kroatia, Israel, Turkia, Espanya, Fransia, Italia, Portugal, Ingletiera, Serbia i Bosna), entre estos Eliezer Papo, Hilary Pomeroy, Yuval Harari, Moisés Orfali, Deniz Bali, José Ramón Magdalena, Tamar Alexander, Merixtell Blasco, Karen Gerson, Rozita Iles Musafia i Peter Lehnard.
Revista Maguén Escudo 