Eliézer Papo
Las otoridades de muestra Universidad saludan i stimulan muestra inisiativa de establesimiento de un muevo Instituto de Estudios Sefaradis, dientro del kual funksionaran kuatros sentros:
1.- Sentro Moshe David Gaon, fondado ya en el anyo 2004, el kual ya obtuvo un renome internasional, i el kual se spesializara, dezde alora, ekskluzivamente en la kultura sefaradi del kontorno eks-osmanli, konchentrando se en komunidades djudias de Bosnia, Dalmatsia, Serbia, Romania, Makedonia, Bulgaria, Gretsia, Turkia i Tierra de Israel, mizmo komo en las komunidades emigrantes de estos paizes en la Europa sentrala i en las Amerikas.
2.- Sentro de Investigasion de Hakitia, el kual se dedikara a la lengua i a la kultura de los Sefaradis en el Norte de Afrika, en komunidades komo Tandjer, Tetuan, Seuta i Melilya, las kualas se dezvaloparon en un kontakto bivo kon la kultura arabe, de una parte – i la ispanika (kon la kuala los Sefaradim del Imperio Otomano kaji non tuvieron kontaktos despues de la Ekspulsion) de la otra.
3.- Sentro para la investigasion de la kultura djudeo-iberika, el kual se dedikara a la glorioza produksion kulturala i literaria de los Djudios en la Peninsula Iberika antes de la Ekspulsion en ebreo i arabe.
4.- Sentro de Investigasion de los Anusim, el kual se dedikara en la kultura de los desendentes de kriptodjudios ke se kedaron la peninsula a la ora de la Ekspulsion, ke kontinuaron a fuir de Espanya i Portugal a lugares donde podian reabrasar sus Djudaizmo, primeramente a Olanda i Ingletiera i despues tambien a las kolonias de estas dos en el muevo mundo.
En los ultimos anyos somos testigos de un fenomeno kultural identitario de prima klasa. Mas i mas djente en el mundo ispano-parlante, tanto en Espanya komo en Amerika Latina, se kreen por desendetes de los Anusim (descendientes de judíos conversos). Munchos de entre eyos bushkan modos i maneras de ser rekonosidos komo Djudios por el resto del puevlo i sus institusiones. Kreamos ke ya vino la ora de estrechar la aslaha ke tuvimos kon el Sentro Gaon, i de aplikar la mizma manera de lavoro en sinko planes (investigasion, edukasion, arte i kultura, komunidad i relasiones puvlikas) tambien a muestras komunidades konfraternas i sus kulturas respektuozas.
Los butos del muevo Instituto son: prezervasion, mantenimiento, investigasion i difuzion de la kultura sefaradi en todas sus epokas (antes i despues de la Ekpulsion) i en todas sus variantas (tal i komo fue dezvalopada en las komunidades de los Balkanes i Azia Minor, en el Medio Oriente i en el Israel, en la Afrika del Norte i en la Europa Sentrala, en las Amerikas i en la Kanada).
Kreyendo ke los Sefaradim azian parte del mozaiko sosio-kultural en kada lugar i lugar onde bivieron, bushkaremos de ayudar dezvalopamiento de investigadores lokales de todos estos lugares, los kuales regrutaran sus konosimentos del paiz, su istoria, lengua i kultura, para poder definer lo special de kada komunidad djudia en su propio konteksto.
Esto ya lo logrimos en los Balkanes, ama mos keda mucho de fazer en el resto de la Disperzion sefardi.
Mizmo komo, establesiendo a El Prezente komo prima revista akademika internasionala ke puvliko artikulos sientifikos en djudeo-espanyol (la koza ke, loores al Dio, dezde la revolusion muestra se izo de modas); alora keriamos alkansar lo mizmo kon la Hakitia i kon el djudeo-arabe.
Para poder realizer este esfuenyo tenemos menester de regrutar un fondo de 1.000.000 shekeles. Vos rogamos de difundir a esta informasion i esta petision a kuanta mas djente, porke kada shekel konta.
Sigun dize un refran maestro: Grano a grano, inche la gayina al papo. Solo el establesimiento de un Instituto de este tipo aseguraria definitivamente el avenir de Estudios Sefaradis en la UBG. Otro refran sefaradi dize Kon fatiga i esperansa, todo se alkansa. Esperamos de ser kapaches de konvalidarlo.
Revista Maguén Escudo 